أسباب التسقيط
تكلم الأستاذ الدكتور عمرو حسن الحسني أحد أشهر أساتذة المخ والاعصاب بمصر و الشرق الأوسط عن التسقيط
أسباب كتير تخلينا عندنا نوم مفاجيء أو ميل للنوم أثناء النهار
١-داء التغفيق
Narcolepsy
التغفيق كلمه صعبه شويه خلوها داء التسقيط
شخص بيسقط طوال اليوم
بينام في اي فرصه
نوم نوم بجد يعني مش هزار... تلت او نصف ساعه و ممكن يحلم كمان
ينام في مواصلات مثلا .. عند الحلاق.. ادام التلفزيون ..و الكارثه ممكن يسقط و هو سايق ده مرض نتيجه نقص ماده hypocretin في المخ و يحتاج علاج دوائي.
أسباب تانية بتخلي نومنا بالليل مش كويس و عشان كده تاني يوم بنفضل نسقّط زي
٢- الأرقinsomnia :
مش عارف تدخل في النوم أو بتنام علي طول بس النوم متقطع (fragmented sleep) أو بتنام كويس بس بتصحي بدري أوي عن المعاد المحدد.
الأسباب: عاده بتبقي الضغط العصبي و النفسي أو شرب مشروبات الكافيين كتير .. كمان السيدات و كبار السن عرضه أكتر و الشغل بنظام الورديات اللي بتغير كل شويه مواعيد النوم
٣ - انقطاع النفس أثناء النوم
Obstructive Or central Sleep Apnea
و ده ممكن يحصل لمده ثواني و تؤدي الي تقطيع النوم و كمان بتزود ثاني أكسيد الكربون في الدم و ده ممكن يخلي الواحد يقوم من النوم بصداع شديد و يخليه علي مدار اليوم عايز ينام و حاسس انه مشبعش نوم
٤- تململ الساقين
Restless leg syndrome
اللي هو احساس بنمل او حاجه ماشيه علي رجليا الاتنين و انا نايم بتخلي الشخص النايم يحرك رجليه كتييير جدا و يحك رجل بالرجل التانيه و الحاله دي ليها أسباب كتير منها حاجات بسيطه زي نقص الحديد و بتتحسن بأدويه الدوبامين .
٥- بعض الأدوية المهدية و المنومه و باسط العضلات و ادويه الحساسيه ممكن تنيم زيادة
٦- الامراض العامه زي الغدة الدرقية و السكر و القلب و الكلي و الكبد ممكن تسبب مشاكل في النوم
لازم ناخد بالنا ان في ظواهر طبيعيه عند ناس لا تصنف علي انها اضطرابات نوم
ناس طول عمرها بتنام كتير بالليل ١٠ الي ١٢ ساعه و متبقاش فايقه الا بالعدد ده من الساعات
ده طبيعي اسمهم
long sleeper
ناس طول عمرها بتنام قليل و ٣ او ٤ ساعات نوم بالنسبه لهم كافيين جدا و ليقوموا مبسوطين .. دول طبيعين و اسمهم
short sleeper
نصائح مهمه جدا عشان ننام أحسن :
١- يجب تجنب الكافيين و المنبهات و مشروبات الطاقة.بعد الساعه ٥ م (خلي بالك الكولا و الشيكولاته فيهم كافيين)
٢- حافظ علي درجة حرارة متوسطة بغرفتك (١٨ - ٢٥ درجة مئوية) و استخدم سرير مريح للنوم.
٣- الهدوء و خفض الإضاءة قدر الإمكان يساعدان علي افراز الميلاتونين الذي يساعد علي النوم.
٤- إذهب الي النوم و استيقظ قي اوقات ثابتة كل يوم (حافظ علي روتينك اليومي) لأن تغيير مواعيد النوم بيأثر علي جوده النوم.
٥- تجنب الاكلات الدسمة و التقيله و الوجبات السريعة أو التدخين قبل النوم.
٦- تجنب ممارسة الرياضة قبل النوم مباشره عشان هتصعب الدخول في النوم
٧- بلاش التليفزيون او الكمبيوتر علي السرير. خلي السرير للنوم فقط.
٨- متنامش فترة طويلة اثناء النهار ( مش المفروض تزيد مده القيلولة عن ساعة) ٣ و ٤ ساعات دي غيبوبه مش قيلوله.
٩- لا تضع أية أجهزة الكترونية ( كالتليفون المحمول) بجانب السرير( بلاش الشاحن والموبايل اللي جنب السرير دول عشان خاطري).
١٠- و طبعا محبكش نتناقش في المشاكل و بالذات الساده الأزواج و الزوجات قبل النوم ..خلي الليله تعدي
